Dosent Sevda İsmayılovanın “1930-cu illərin repressiyaları və Azərbaycan ali məktəbləri” mövzusunda elmi seminarı keçirilmişdir.
25 dekabr 2024-cü ildə Tarix fakültəsi Azərbaycan tarixi (humanitar fakültələr üzrə) kafedrasının dosenti, t.ü.f.d. Sevda İsmayılovanın “1930-cu illərin repressiyaları və Azərbaycan ali məktəbləri” mövzusunda elmi seminarı keçirilmişdir. Elmi seminar 1937-1938-ci illərin kütləvi repressiyalarının sovet hakimiyyətinin Azərbaycanda milli-mənəvi sahədə həyata keçirdiyi siyasətə və onun mahiyyətinə həsr olunmuşdur. Fakültə rəhbərliyinin, professor-müəllim heyətinin, doktorant, magistrant və tələbələrin iştirakı ilə baş tutan seminarda Sevda İsmayılova 1930-cu illərdə Azərbaycan SSR-də sovet hakimiyyətinin ali məktəblərdə tələbələrə qarşı həyata keçirdiyi repressiyaların Azərbaycan cəmiyyətinin intellektual və yaradıcı şəxslərini, özündə azərbaycançılıq fikirlərini daşıyan təbəqəsini məhv etməyə yönəlməsini faktlarla göstərilmiş, müstəqil fikrini söyləyən tələbələrin aqibətinin “demokratik və humanist” sovet rejiminin ədalətsiz siyasətinin qurbanı olması, BDU-dan, komsomol sıralarından xaric edilmələri, azadlıqdan məhrum edilmələri, müxtəlif cəzalara məhkum edilmələri ilə bağlı geniş məlumat vermiş, iştirakçıların suallarını cavablandırmışdır. Seminarda fakültə dekanı professor İbrahim Zeynalov, elmi işlər üzrə dekan müavini Kəmalə Nəcəfova, kafedra müdirlərindən dosent Azad Rzayev, dosent Mehman Abdullayev, fakültənin müəllimləri maraqlı və ətraflı çıxışa görə Sevda İsmayılovaya təşəkkürlərini bildirmişlər.
