BDU aliminin məqaləsi yüksək istinadlı beynəlxalq jurnalda dərc edilib
Bakı Dövlət Universitetinin (BDU) Tarix fakültəsinin Asiya və Afrika ölkələri tarixi kafedrasının dosenti Aida Bağırovanın müəllifi olduğu “The Iraqi case of inter-arab integration: between theory and practice” (Ərəblərarası inteqrasiyanın İraq nümunəsi: nəzəriyyə və təcrübə arasında) adlı məqalə Web of Science bazasına daxil olan “Voprosy Istorii” (2022; Volume: 3; Issue: 2) adlı jurnalda dərc edilib.
Məqalədə göstərilir ki, ərəb birliyi konsepsiyasının əhəmiyyətli komponenti olan ərəblərarası inteqrasiya problemi dərin tarixi və sosial-mədəni köklərə malikdir və ərəb dünyasında müasir dövlətçiliyin yaranma tarixi ilə sıx bağlıdır. Məqalədə ərəblərarası inteqrasiyanın əsas mərhələləri müzakirə olunur, bu mərhələlərin hər birinin spesifik xüsusiyyətlərinə toxunulur, eyni zamanda ən mühüm birləşmə layihələri təhlil edilir. Bu məqalədə aparıcı ərəb ölkələrindən biri olan İraq nümunəsi əsasında ərəb birliyi konsepsiyasına xüsusi diqqət yetirilir. Qeyd olunur ki, İraqda Baas Partiyasının hakimiyyəti dövründə (1963, 1968-2003) ərəb birliyi konsepsiyası dövlət siyasətinə çevrilib. Lakin müxtəlif obyektiv və subyektiv amillərin təsiri altında o, tam birləşmə və federasiyadan tutmuş, əhatə dairəsi daha dar olan subregional alyanslar çərçivəsində əməkdaşlığa qədər əhəmiyyətli təkamülə məruz qalıb.
Məqaləni aşağıdakı linkdən oxumaq olar:
https://doi.org/10.31166/VoprosyIstorii202203Statyi45
