Bakı Dövlət Universiteti Tarix fakültəsi

2024-cü il 28 oktyabr tarixində Azərbaycan tarixi (təbiət fakültələri üzrə) kafedrası nəzdində Dünya azərbaycanlıları: tarixi-demoqrafiya ETL-də “1918-1920-ci illərdə Zəngəzur soyqırımı” mövzusunda ETL-in aparıcı elmi işçisi, t.ü.f.d. Fərəcov Şəfayət Fərəc oğlunun məruzəsi dinlənildi. Elmi seminarda Tarix fakültəsinin elmi işlər üzrə dekan müavini dosent Kəmalə Nəcəfova, Azərbaycan tarixi (təbiət fakültələri üzrə) kafedrasının müdiri, dosent Mehman Abdullayev, ETL-in və kafedranın əməkdaşları və tələbələr iştirak ediblər.

Elmi seminarı giriş sözü ilə açan dosent Mehman Abdullayev ETL-in fəaliyyəti, keçirilən elmi seminarların əhəmiyyəti haqqında danışdı və elmi seminarı açıq elan edərək sözü məruzəçiyə verdi.

Fərəcov Şəfayət məruzəyə başlayaraq bildirdi ki, son dövrlərdə Zəngəzur bölgəsinin tarixini tədqiq etmək tariximizin ən aktual məsələlərindən biridir. Zəngəzurda baş verən soyqırım, tarixi məskənlərimizin adlarının dəyişdirilməsi, əhalinin tamamilə Zəngəzurdan (Gorus, Sisyan, Qafan, Mehri) qovulub çıxarılmasını tədqiq etmək zəruriyəti ermənilərin azərbaycanlılara qarşı apardığı genosid siyasətini tarixi faktlarla dünyaya çatdırmaqdan ibarətdir. 1813 və 1828-ci illərdə Qacarlarla Rusiya arasında bağlanan Gülüstan və Türkmənçay müqavilələrindən sonra Azərbaycan ərazisinə köçürülüb gətirilən ermənilər ölkəmizin digər ərazilərində olduğu kimi, Zəngəzurda da yerli azərbaycanlıları sıxışdırıb çıxarmağı qarşılarında məqsəd qoydular. Məqsədlərinə nail olmaq üçün torpağın əsl sakinlərinə qarşı zorakı və qeyri-insani üsullarla qırğınlar törətməyə və digər müxtəlif üsullardan istifadə etməyə başladılar. Nəticədə, Qərbi Azərbaycan ərazisində “türksüz ermənistan” yaratmağı bacardılar.

Seminarda bu mövzuda yeni tədqiqatların təqdim olunması vacib sayıldı. Bir saata yaxın davam edən elmi seminar çıxışlar və suallarla yekunlaşdı.